Kira-kira dua taon yang sudah engkong lagi jalan-jalan ke komplek perumahan di sawangan. Waktu entuh banyak orang-orang pade treak “maling motor…maling motor…..maling motor”. Nah engkong jadi kaget tuh. Dalam ati engkong bekate “ade ape nih orang-orang pade treak maling.. maling. Mane maling nyeh…? Lagian maling ape….? Eh kagak taunye ada orang lagi diuber-uber ame orang kampung. Banyak banget. Kate engkong “nah tuh dia malingnya ngkali…” Terus engkong ngeliat tuh maling di kepung dari depan belakang samping kiri kanan, ya jelas aje tuh maling kagak bisa ngapa-ngapain cumen pasrah doang. Kagak lame tuh maling digebukin rame-rame. Ada nyang pake kayu, ada nyang pake besi, ada juga nyang pake batu orang ditiban, ya pade bocor tuh maling. Darah ocor-ocoran di kepale, dipahe ame di dade, ya kelenger tuh orang, diem aje, pingsan ngkali.
Orang-orang kampung pada ngumpul pengen ngeliat tuh maling nyang ude pada bonyok. Tau-tau ada orang nyang nyiramin bensin ke tuh orang nyang ude gak pedakse (tak berdaya), eh terusnye dilemparin korek api nyang ude nyale, ya kontan aje tuh badannye bekober api. Disitu tuh engkong jadi ngerenes (kasihan) ngeliatnye, ade orang dibakar idup-idup. Masya Allah…………….
Kan katanye kite bangse Indonesia adalah bangse yang berbudaye, baik tutur katenye, sopan santun sikapnye, tapi itu dulu….. sekarang kayanye udah enggak begitu lagi orang-orang kite. Suka banget ame nyang namanye gebukin orang, ape orang itu orang salah atawe kagak salah yang penting gebikin aje dulu. Kagak ngeliat dulu ape soalnye. Pokoknye begitu ngeliat orang gebukin orang kite langsung aje ngikut-ngikut gebukin. Kalu begini caranye berarti emang bener-bener ude pade rusak atinye. Dimane iman kite….? Walaupun orang itu salah ya jangan begitu caranye. Kan ada aparat hukum. Kita serain aje biar die die pade nyang ngurusin. Cobalah kite renungin …. Bagaimane anak-anak kite nanti kalau die ngeliat kite-kite orang tuanye laganye kaya preman. Emang mao kite punya anak jadi penjahat? Siape nyang ngedoain kita nanti didalam kubur kalo anak kita gak ada nyang soleh…..? masuk neraka deh kite……. Nauzubilaahi min zalik…… jangan sampe. (Kong Jaya dari tanah betawi)
Tidak ada komentar:
Posting Komentar